गेल्या काही वर्षांपासून परदेशस्थ मंडळींनी आपापल्या देशांतच विविध भारतीय सण साजरे करण्यास सुरुवात केली. त्यानिमित्ताने तेथील अन्य भारतीय मित्रमंडळी, नातेवाईक एकमेकांकडे जाऊ लागले. गणपती सणाच्या निमित्ताने अगदी फराळाच्या पदार्थांपासून ते गणेश मूर्ती पर्यंत सारे काही भारतातून परदेशात जाऊ लागले. सध्या तर त्याला विशेष बिजनेसचे स्वरुप आले आहे. मग त्यानिमित्ताने आपल्याप्रमाणे तिकडेही घरोघरी मोठ्या प्रमाणात गणेश आरत्या सुरू झाल्या. अगदी रोज नाही पण सणाच्या १० दिवसांपैकी किमान सुटीचा एक दिवस सर्व मंडळी एकत्र येऊन आरतीचा आनंद घेतात. त्यानंतर महाप्रसाद. आपल्याकडे हल्ली कमी होत जाणारी ही प्रथा परदेशात मात्र आता चांगली रुजतेय.  

त्यातही गेली काही वर्ष आणखी एका नव्या उपक्रमाची भर पडली. मुळचे पुण्यातील रहिवासी असलेले व सध्या फिनंलड देशात स्थायीक असलेले सॉफ्टवेअर इंजिनिअर श्री. हेरंब कुलकर्णी यांनी २०१२ या वर्षी गणेश ग्लोबल महाआरती हा उपक्रम सुरू केला. त्यासाठी त्यांनी संपूर्ण युरोपातील त्यांच्या नेटवर्कमधील भारतीयांशी संपर्क साधला. त्यानुसार युरोपातील विविध देशांतील भारतीयांनी सकारात्मक प्रतिसाद दिल्यावर सर्वांच्या सोयीने ( विविध टाईम झोन्सचा विचार करुन ) एक वेळ ठरवण्यात आली. त्या ठरलेल्या वेळेवर महाआरतीला सुरुवात करुन सर्वांसाठी इंटरनेटच्या माध्यमातून ती लाईव्ह उपल्बध करुन देण्यात आली. फिनलंड देशातील भारतीय हेरंब यांच्या घरीच उपस्थित होते. तर अन्य देशांतील नागरिकांना वेळ पाळत त्यामध्ये सहभागी होण्याची किमया केली. आठ देशांतील भारतीयांनी यात सहभाग नोंदवला. 

यंदाच्या वर्षी देखील हाच उपक्रम पार पडणार आहे २ सप्टेंबर २०१७ रोजी,शनिवारी . यंदाही या उपक्रमात ३० हून अधिक देश आणि ८०० हून आणि गणेशभक्त सहभागी होण्याचा अंदाज आहे. प्रामुख्याने स्कँडिनेव्हियन आणि युरोपीय देशांतील भक्तगण या गणेश ग्लोबल महाआरतीसाठी एकत्र येतात. या वर्षी फिनलंडच्या वेळेनुसार सायंकाळी ६ वाजता ही महाआरती सुरू होईल. मध्य युरोपीय देशांच्या टाईम झोननुसार ही वेळ सायंकाळी ५ असेल. तर, पुर्वेचे आणि अति पश्चिमेचे देश त्यांची योग्य वेळ जमवून या आरतीसाठी तयार राहतील. सुरूवातीला अथर्वशीर्ष, प्रणम्य शिर्षादेवं.. आदी स्तोत्रे म्हटली जातील.